بە ئامادەبوونی ژمارەیەكی بەرچاو لە ڕۆژنامەنووسان و ڕۆشنبیران و كەسایەتییەكانی شاری كەركوك، سێشەممە كاتژمێر 10ی سەرلەبەیانی ڕێكەوتی 22ی نیسانی 2025 لە هۆڵی ئەفراحی قەراخ چۆمی خاسە، لە پانێڵێكی تایبەت بۆ ئەم یادە پیرۆزە ئامادەبوون و وێڕای پیرۆزباییكردنی ئەم یادە لە ڕۆژنامەنووسان و ئامادەبووانی بەڕێز و چەند ساتێك ڕاوەستان بۆ گیانی شەهیدانی قەڵەم و ڕۆژنامەگەری، هەرسێ ڕۆژنامەنووسی بەڕێز (مامۆستا تاریق كارێزی، كاك شوان داودی، شێخ صدیق) لە پانێڵێكدا تیشكیان خستە سەر چۆنیەتی دامەزراندنی سەندیكای ڕۆژنامەنووسانی كوردستان و ئەو ئاڵنگاری و كۆسپ و لەمپەرانەی هاتۆتە بەردەم كارەكانیان و دامەزراندنی لقی كەركوكی سەندیكا لە دوای ڕووخانی ڕژێمی بەعس و ئامادەبووانیش بە ڕاوسەرنج و ڕەخنەكانیان پانێڵەكەیان دەوڵەمەندتر كرد.
كاك مەهدی زریانیش وەكو سكرتێری ئێستای لقی كەركوكی سەندیكا ڕاو سەرنجەكانی خۆی پێشكەش كردو وەڵامی پرسیارو ڕەخنەی بەشێك لە ڕۆژنامەنووسان و ئامادەبووانی دایەوە.
