بەرپرسی کاروباری کولتوور و پەروەردەو راگەیاندنی کۆنسوڵخانەی ئەمریکا لەگەڵ ئەنجوومەنی سەندیکای رۆژنامەنووسانی کوردستان کۆبووەوە.
رۆژی یەکشەممە رێککەوتی 22ـی 1ـی 2023، دەگ مۆرۆ بەرپرسی کاروباری کولتوور و پەروەردەو راگەیاندن لە کۆنسوڵخانەی ئەمریکا، بە هاوکاری سەرباز حەمەخان شارەزای راگەیاندن، سەردانی ئەنجوومەنی سەندیکای رۆژنامەنووسانی کوردستانی کرد.
دەگ مۆرۆ لەگەڵ ئازاد حەمەدەمین، نەقیبی رۆژنامەنووسانی کوردستان و بژار حەکیم جێگری نەقیب و ئەکەد موراد ئەندامی ئەنجوومەن کۆبووەوە.
لە کۆبوونەوەکەدا گفتوگۆکرا لەبارەی دۆخی ئازادی رۆژنامەگەری و یاسا بەرکارەکانی میدیا لە هەرێمی کوردستان.
لە کۆبوونەوەکەدا لەلایەن نەقیبی رۆژنامەنووسانی کوردستان، بەرچاو روونی بە کۆنسوڵخانەی ئەمریکا درا، لە بارەی دۆخی کاری میدیاو کێشەو گرفتەکانی بەردەم کاری رۆژنامەنووسی.
لە بەشێکی دیکەی کۆبوونەوەکەدا، نێردەی کۆنسوڵخانەی ئەمریکا بە بایەخەوە هەوڵ و رۆڵی سەندیکای لە خزمەت رۆژنامەنووسان بە گرنگ وەسف کردوو، جەخت لە هەبوونی پەیوەندییەکی باش لەنێوان کۆنسوڵخانەی ئەمریکاو سەندیکای رۆژنامەنووسانی کوردستان کرایەوە.
