ژمارەیەک خانمە رۆژنامەنووسی کەناڵەکانی راگەیاندن، لە هەرێمی کوردستان، دوای تەواوکردنی خولێکی درێژخایەن بوونە راهێنەری بواری سەلامەتی پیشەیی.
رۆژی چوارشەممە رێککەوتی ٢٥ـی ١ـی ٢٠٢٣، لە هۆتێل چوارچرای شاری هەولێر، کۆتایی بە خولی درێژخایەنی سەلامەتی پیشەیی هات، تێیدا ژمارەیەک خانمە رۆژنامەنووس بڕوانامەی نێودەوڵەتیان لەلایەن فیدراسیۆنی رۆژنامەنووسانی جیهان و سەندیکای رۆژنامەنووسان پێبەخشرا.
لە رێوەرەسمی کۆتایی خولەکەدا، کە بۆ ماوەی شەش مانگی خایاند، هەریەک لە مونیر زەعروور، نوێنەری فیدراسیۆنی رۆژنامەنووسانی جیهان، ئازاد حەمەدەمین، نەقیبی رۆژنامەنووسانی کوردستان و بژار حەکیم جێگری نەقیبی رۆژنامەنووسان و هەندرێن ئەحمەد سکرتێری ئەنجوومەنی سەندیکا ئامادەبوون.
لە رێورەسمەکەدا بڕوانامەی راهێنانی سەلامەتی پیشەیی بەخشرایە بەشداربووانی خولەکە کە پێکهاتبوون لە: بەهرەگەردی فەرمانگەی میدیا وزانیاری، کانیاو بایز بەرپرسی راگەیاندنی حزبی شیوعی، ڤیان محمود کەناڵی سپێدە، شەیما بایز کوردستان ۲٤، سۆلین کوێخا لە کوردسات نیوز، زفين مهدي حسين کەناڵی زاگرۆز، ئەمەل باجەلان، بەرپرسی نووسینگەی خانەقینی سەندیکا، زەینەب سندی، ئەندامی لقی هەولێری سەندیکا.
سەندیکای رۆژنامەنووسانی کوردستان پیرۆزبایی لە بەشداربووانی خولەکە دەکات، هیوادارە کە بەشداربووان بتوانن وەک راهێنەر خزمەت بە هاوکارەکانیان بکەن لە دەزگاکانیاندا، لەبارەی هۆشیاری سەلامەتی پیشەییدا.
