رۆژی یەکشەممە ڕێککەوتی ٢٢ـی ٥ـی ٢٠٢٢ لە هۆڵی مۆنۆمێنتی هەڵەبجە، ڕێوڕەسمی ناساندن و بڵاوکردنەوەی بیبلۆگرافیای راگەیاندن نامەی ماستەر و دکتۆراکانی کورد لە بواری راگەیاندن بڵاوکرایەوە.
لە ڕێوڕەسمەکەدا ئازاد حەمەدەمین نەقیبی رۆژنامەنووسانی کوردستان و بژار حەکیم، جێگری نەقیب و ئەکەد موراد و ئاری عەبدوللەتیف ئەندامی ئەنجوومەن ئامادەی بوون.
هەروەها ئازاد تۆفیق پارێزگاری هەڵەبجەو دکتۆرە مهاباد کامیل سەرۆکی زانکۆی هەڵەبجە و ژمارەیەک لە پەرلەمانتار و مامۆستایانی زانکۆش لە ناساندنی کتێبەکەدا لە هەڵەبجە بەشداربوون.
پێش دەستپێکردنی رێوەڕەسمەکە، ئازاد تۆفیق، پارێزگاری هەڵەبجە لە دیوانی پارێزگا پێشوازی لە نەقیبی رۆژنامەنووسانی کوردستان و شاندی ئەنجوومەنی سەندیکا کرد و دۆخی میدیا لە پارێزگاکەدا تاوتوێکرا.
کتێبی بیبلۆگرافیای راگەیاندن نامەی ماستەر و دکتۆراکانی کورد لە بواری راگەیاندن، لەلایەن دکتۆر ئەکرەم فەرەیدوون ئامادەکراوەو بە هاوبەشی سەندیکای رۆژنامەنووسانی کوردستان و ئەکادیمیای کوردی چاپکراوە.
ئەم بیبلۆگرافیایە چوار بەرگەو زیاتر لە دوو هەزار لاپەڕەیە، کە دەبێتە سەرچاوەیەکی گرنگی زانستی لە بواری میدیا بەتایبەت وەک سەرچاوەیەکی گرنگ بۆ بە دیکیۆمێنت کردنی نامەی ماستەرو دکتۆرا لە بواری راگەیاندن لە هەرێمی کوردستان.
