سەندیکای رۆژنامەنووسانی کوردستان رێککەوتنامەیەکی کاری هاوبەش لەگەڵ سەندیکای رۆژنامەنووسانی تونس ئیمزا دەکات

مەسقەت – سوڵتانشینی عومان

2ی حوزەیران2022

لەهەنگاوێكی گرنگدا، هەردوو سەندیكای رۆژنامەنووسانی كوردستان و سەندیكای رۆژنامەنووسانی تونس، رێككەوتنامەی كاری هاوبەشیان ئیمزاكرد، ئەم هەنگاوە، لەداهاتوودا دەكەوێتە بواری جێبەجێكردن.

لەپەراوێزی 31ـەمین كۆنگرەی فیدراسیۆنی رۆژنامەنووسانی نێودەوڵەتی IFJ ‌و دوای دوو رۆژ گفتگۆی شاندی هەردوو سەندیكا، لەبارەی كاری هاوبەش‌و گۆڕینەوەی شارەزایی‌و چۆنیەتی هاوكاریكردنی یەكتری ، شاندی سەندیكای رۆژنامەنووسانی كوردستان و سەندیكای رۆژنامەنووسانی تونس كەبەشداری لەكۆنگرەی فیدراسیۆنی نێودەوڵەتی رۆژنامەنووسان دەكەن، گەیشتنە بنەمایەكی هاوبەش‌و بەڵگەنامەی لێكگەیشتن‌و كاری هاوبەشیان ئیمزاكرد.

رێككەتنامە، لەسەر بنەمای سێ خاڵی سەرەكی نووسراوە، كەبریتیە لە هەماهەنگی‌و هاوكاری هاوبەش لەدۆسیەكانی پەیوەست بە كەرتی رۆژنامەگەری ‌و ئازادییەكان‌و گۆڕینەوەی شارەزایی و پشتگریكردنی باشتركردنی كاری رۆژنامەگەری‌و بنەما یاساییەكانی پەیوەست بە پیشەی رۆژنامەگەری‌و چاودێریكردنی سەلامەتی پیشەیی‌و رۆژنامەنووسان بەهەردو رەگەز و چۆنیەتی پاراستنی كۆمەڵگە لە هەواڵی درۆ و ناراست و پشتگیریكردنی مافەكانی مرۆڤ، بەپشت بەستن بەمیكانزمێكی كار لەرێگەی ئامادەكردنی پرۆژە‌و چاڵاكی هاوبەش.

پرۆسەی بەڵگەنامەی كاری هاوبەش لەلایەن هەردوو نەقیبی رۆژنامەنووسانی كوردستان‌و رۆژنامەنووسانی تونس لەناو هۆڵی كۆنگرەی فیدراسیۆنی رۆژنامەنووسانی نێودەوڵەتی ئیمزاكرا.

سەندیكای رۆژنامەنووسانی كوردستان بەیاسای ژمارە 4ی ساڵی 1998 ی هەمواركراو بەژمارە 40ی ساڵی 2004 دامەزراوەو كاری سەندیكای خۆی دەكات ، سەندیكای رۆژنامەنووسانی تونسیش ، وەكو رێكخراوێكی پیشەی لەساڵی 1969 دامەزراوەو دواتر لە لەساڵی 2008 خۆی گۆڕیوە بۆپەیكەری سەندیكایی‌و یەكێكە لەسەندیكا چاڵاكەكانی ناوچەی رۆژئاوای ئاسیا‌و باكوری ئەفریكیا ، هەردوو سەندیكای كوردستان‌و تونس ، ئەندامی كارای فیدراسیۆنی رۆژنامەنوسانی نێودەوڵەتین.