نوێنەری فیدراسیۆنی رۆژنامەنووسانی جیهان و ئەنجوومەنی سەندیکای رۆژنامەنووسانی کوردستان، لەگەڵ بەڕێوەبەری ژمارەیەک لە کەناڵی ئاسمانی کۆبوونەوە.
رۆژی سێشەممە رێککەوتی2023/1/24 لە ئۆفیسی سەرەکی ئەنجوومەنی سەندیکای رۆژنامەنووسانی کوردستان، مونیر زەعروور، بەرپرسی سیاسەت و پلاندانانی رۆژهەڵاتی ناوەڕاست و باکووری ئەفریقا، هەروەها ئازاد حەمەدەمین، نەقیبی رۆژنامەنووسانی کوردستان، بژار حەکیم، جێگری نەقیبی رۆژنامەنووسان، هەندرێن ئەحمەد سکرتێری ئەنجوومەن و ئەکەد موراد ئەندامی ئەنجوومەن، لەگەڵ بەرێوەبەری گشتی کوردستان 24 ، سەرپەرشتیاری گشتی و بەڕێوەبەرانی کوردستان تیڤی و زاگرۆز عەرەبی، بەڕێوەبەری گشتیی سپێدە، بەڕێوەبەری نووسینگەی هەولێری کوردسات نیوز، کۆبوونەوە.
لە کۆبوونەوەکەدا گفتوگۆکرا لەبارەی سەلامەتی پیشەیی رۆژنامەنووسان لە کوردستان و تاوتوێی پرسی خۆپاراستنی رۆژنامەنووسان لەکاتی شەڕ و ئاشتیدا کرایەوە.
لە بەشێکی دیکەی کۆبوونەوەکەدا، ئاماژە بەوەکرا، لە ئاییندەیەکی نزیکدا یادداشتی لێکتێگەیشتن لەنێوان سەندیکای رۆژنامەنووسانی کوردستان و کەناڵەکانی راگەیاندندا واژۆ بکرێت، بۆ ئەوەی دەزگەکانی راگەیاندن پابەندی سەلامەتی پیشەیی رۆژنامەنووسان بن و بایەخ بەم بابەتە بدەن.
بانگهێشتکردنی بەڕێوەبەری ئەم کەناڵانە بۆ کۆبوونەوە، پەیوەستە بە بەشداریکردنی رۆژنامەنووسەکانیان لە خولی درێژخایەنی سەلامەتی پیشەیی کە بڕوانامەی راهێنەرایەتیان پێدەدرێت.
