رۆژی پێنجشەممە رێککەوتی ٢٠٢٣/١/٢٦ مونیر زەعرور بەڕێوەبەری سیاسەت و پلاندانی روژهەڵاتی ناوەڕاست لەفیدراسیۆنی رۆژنامەنووسانی نێودەوڵەتی، بەیاوەری بژار حەکیم جێگری نەقیبی رۆژنامەنووسانی کوردستان و هەندرێن ئەحمەد سکرتێری ئەنجومەنی سەندیکای رۆژنامەنووسانی کوردستان، سەردانی هەڵەبجەیان کرد و لەلایەن سکرتێر و ستافی لقی هەڵەبجەی سەندیکای ڕۆژنامەنوسانی کوردستانەوە پێشوازیان لێکرا.
لەسەرەتای سەردانەکەدا شاندەکە مۆنۆمێنتی هەڵەبجەیان بەسەرکردەوە و لەمیانەی کۆنفڕانسێکی رۆژنامەنووسیدا گرنگی رۆڵی رۆژنامەنووسان لەرووماڵکردنی تاوانی کیمیابارانی هەڵەبجە لەپاش کیمیابارانی شارەکە خستەڕوو.
دواتر سەردانی بارەگای لقی هەڵەبجەی سەندیکای رۆژنامەنووسانی کوردستانیان کرد و لەکۆبوونەوەیەکی تایبەتدا دۆخی رۆژنامەنووسانی شارەکە تاوتوێ کرا.
دواتر مونیر زەعروور، لە شاری سلێمانی سەردانی دەزگای میدیایی کوردساتی کرد، لەگەڵ دێرین رەشید، بەڕێوەبەری گشتیی دەزگاکەو بەڕێوەبەری بەشەکان کۆبووەوە.
نوێنەری ifj لەگەڵ بەڕێوەبەری گشتیی کوردسات تاوتوێی سەلامەتی پیشەیی رۆژنامەنووسانی کرد، هەروەها جەخت لە هەماهەنگی نێوان دەزگاکانی راگەیاندن لەگەڵ سەندیکا کرایەوە، بۆ زیاتر بە پیشەیی کردنی کاری رۆژنامەنووسی.
سەردانی مونیر زەعروور بۆ کوردسات لەکاتێکدابوو، کە لە چەند رۆژی رابردوودا لە هەولێر لەگەڵ بەڕێوەبەری گشتی ژمارەیەک کەناڵ کۆبووەوە، بەتایبەت ئەو کەناڵانەی کە رۆژنامەنووسەکانیان بەشداربوون لە خولی راهێنانی سەلامەتی پیشەیی و کوردساتیش بەشداربووی لە خولەکەدا هەبوو.
