بە دەستپێشخەری (سەنتەری پارێزگاری ئازادیەکانی رۆژنامەگەریی) ئەمرۆ لە عەممانی پایتەختی ئوردن دیداری ئاییندەی میدیا و گەیاندن، دەستی بەکارەکانی کرد، کە سێ رۆژ بەردەوام دەبێت(17 – 18 – 19 /2023/9 ) ، سەندیکای رۆژنامەنووسانی کوردستان وەکو هاوبەشێکی ستراتیژی سەنتەرەکە بەشاندێک بەشدارە کە پێکهاتوون لە نەقیبی رۆژنامەنووسانی کوردستان ئازاد حەمەدەمین ، بەیاوەری خۆشناف جەمیل و ئەکەد موراد ئەندامانی ئەنجوومەنی سەندیکا، سامان حسین و هەژان سەعید لە سوسیال میدیای کەناڵی K24 .
دیدارەکە پرۆگرامێکی چروپری هەیە لە ماوەی سێ رۆژەکەدا ، رۆژنامەنووسان لە ناوەندەکانی رۆژهەڵاتی ناوین و ئەوروپا، بەرپرسیارێتی و دوارۆژی سوسیال میدیا و پەیوەندی بەرۆژنامەگەریی پیشەیی شەن و کەودەکەن، لە دیدارەکەدا ناوەندەکانی وەکو فیسبوک و تویتەر و ئەکادیمیستانی پسپۆر لە بوارەکانی مافی مرۆڤ و یاساکانی نێودەوڵەتی و میدیا راو بۆچونەکانی خۆیان دەخەنەروو، میدیاکارانی کوردستان لە دوو پانێلی سەرەکی دیدارەکە لەماوەی ئەو سێ رۆژەدا بەشداری دەکەن، لە پانێلی (تەحەدییەکانی بەردەم ماف و ناوەرۆک لە میدیا) ئازاد حەمەدەمین نەقیبی رۆژنامەنووسان بە باسێک بەشدارەو هەروا لە پانێلی(رۆژنامەنووسانی پیشەیی و کاریگەریەکان بەسەر سوسیال میدیاوە) لە سۆسیال میدیای کوردستان 24 هەژان سەعید بە باسێک بەشدارە، چاوەرێ دەکرێ لە کۆتایی دیدارەکەدا بۆندی هاوبەش و لێکتێگەیشتن واژوو بکرێ بۆ بەردەوامبوونی کۆنگرەی دیکە لەم بارەیەوە.
