سەندیکای رۆژنامەنووسانی کوردستان نووسینگەی زاخۆی کردەوەو دواتر نەقیبی رۆژنامەنووسانی کوردستان و جێگرەکەی لەگەڵ ژمارەیەک رۆژنامەنووسی دەڤەرەکە کۆبوونەوە.
ئەمڕۆ چوارشەممە رێککەوتی ٦ـی ١٢ـی ٢٠٢٣ بە ئامادەبوونی ئازاد حەمەدەمین، نەقیبی رۆژنامەنووسانی کوردستان و بژار حەکیم، جێگری نەقیب و ئەکەد موراد ئەندامی ئەنجوومەنی سەندیکا، لە مەراسیمێکدا نووسینگەی زاخۆ کرایەوە.
لە مەراسیمی کردنەوەی نووسینگەی زاخۆی سەندیکای رۆژنامەنووسانی کوردستان، فارس یوحەننا، جێگری سەرپەرشتیاری ئیدارەی سەربەخۆی زاخۆ و ڤیان عەباس، سکرتێر لقی دهۆک و و ئەندامانی لقی سەندیکا و گوتەبێژی پۆلیس و نوێنەری ئاسایشی زاخۆ و دەزگاکانی راگەیاندن ئامادەی بوون.
دواتر لە کۆنفرانسێکی میدیاییدا، نەقیبی رۆژنامەنووسانی کوردستان رایگەیاند؛ کردنەوەی نووسینگەی زاخۆ وەک پشتیوانییەکی مەعنەوییە بۆ ئیدارەی سەربەخۆی زاخۆ و هەروەها بۆ زیاتر پشتیوانی و داکۆکیکردنە لە مافی رۆژنامەنووسانی دەڤەرەکە.
