لیژنەی داکۆکی لە ئازادی رۆژنامەنووسی و مافی رۆژنامەنووسانی کوردستان، لە سەندیکای رۆژنامەنووسانی کوردستان، راپۆرتی ساڵی رابردووی بڵاوکردەوە.
ئەمڕۆ دووشەممە رێککەوتی ٢٢ـی ١ـی ٢٠٢٤، لیژنەی داکۆکی لە ئازادی رۆژنامەنووسی و مافی رۆژنامەنووسانی کوردستان، لە هۆڵی مەلا مەحموودی بایەزیدی لە ئەکادیمیای کوردی، لە رێورەسمێکدا راپۆرتی ژمارە ٣١ و ٣٢ـی پێشێلکارییەکانی دژ بە رۆژنامەنووسان بڵاوکردەوە، دواتر دیبەیتێک لەبارەی رۆژنامەنووسانی مێینە لە هەرێمی کوردستان لەلایەن سێ خانمە رۆژنامەنووس پێشکەشکران.
لە رێورەسمەکەدا کە نەقیبی رۆژنامەنووسانی کوردستان و جێگری نەقیب و سکرتێری ئەنجوومەنی سەندیکاو ژمارەیەک لە ئەندامانی ئەنجوومەن و سکرتێری لقی هەولێری سەندیکا و ژمارەیەکی بەرچاوی رۆژنامەنووسان ئامادەی بوون، ناوەڕۆکی راپۆرتەکە ئاشکراکرا.
لە مەراسیمەکەدا، ئازاد حەمەدەمین، نەقیبی رۆژنامەنووسانی کوردستان، وتەیەکی لەبارەی ئازادی رۆژنامەنووسی پێشکەش کرد، هاوکات نەقیبی رۆژنامەنووسان بەناوی ئەنجوومەنی سەندیکای رۆژنامەنووسانی کوردستان، هێرشە مووشەکییەکەی سەر هەولێری ئیدانەکرد.
دواتر سەرۆک و بڕیاردەری لیژنەی داکۆکی، ناوەڕۆکی راپۆرتی پێشێلکارییەکانی ساڵی رابردوویان بۆ رای گشتی ئاشکراکرد، هاوکات دوای بڵاوبوونەوەی راپۆرتەکەش، پارێزەرانی هەرسێ لقی هەولێر و سلێمانی و دهۆک، لە بەرانبەر ئەرکەکانیان کە بەخۆبەخشی بەرگریی لە رۆژنامەنووسان دەکەن لە دادگەکان خەڵاتی رێزلێنانیان پێبەخشرا.
جێی ئاماژەیە لەگەڵ بڵاوبوونەوەی راپۆرتی پێشێلکاری، راپۆرتێک لەبارەی دۆخی رۆژنامەنووسانی مێینە لە هەرێمی کوردستان بڵاوکرایەوە، کە بایەخ بە پرسی رۆژنامەنووسی مێینە دەدات.
جۆری پێشێلکارییەکان
- راگرتن و دەستگیرکردن 14 حاڵەت بەرامبەر 31 رۆژنامەنووس
- رێگەنەدان بە روومال و جیاکاری 25 حاڵەت بەرامبەر 56 رۆژنامەنووس
- هێرش و سوکایەتی 11 حاڵەت بەرامبەر 24 رۆژنامەنووس
- هەرەشە 3 حاڵەت بەرامبەر 3 رۆژنامەنووس
- شکاندنی کەل و پەلی رۆژنامەوانی و دەست بەسەرداگرتنی 6 حاڵەت بەرامبەر 11 رۆژنامەنووس
- لێدان 2 حاڵەت بەرامبەر 2 رۆژنامەنووس
- هەڵکوتانە سەردەزگای راگەیاندن 1 حاڵەت بەرامبەر 1 دەزگای راگەیاندن
کۆی گشتی 62 حاڵەت بەرامبەر 128 رۆژنامەنووس
بۆ خوێندنەوەی راپۆرت کلیک لەم لینکەی بکەن
https://www.kurdjs.com/kurdish/raport
