لە چوارچێوەی بەرنامەکانیدا، شاندی سەندیکای رۆژنامەنووسانی کوردستان لە پاریس، سەردانی نوێنەرایەتیی حکومەتی هەرێمی کوردستانی کرد.
رۆژی دووشەممە رێککەوتی ٢٢ـی نیسانی ٢٠٢٤، بژار حەکیم، جێگری نەقیبی رۆژنامەنووسانی کوردستان، هەندرێن ئەحمەد، سکرتێری ئەنجوومەنی سەندیکا و هیوا مستەفا، ئەندامی لقی هەولێر، لەگەڵ هەردوو رۆژنامەنووسی دانیشتووی فەرەنسا، کارزان حەمید و لاوکۆ جەلال، سەردانی عەلی دۆڵەمەڕی، نوێنەری حکومەتی هەرێمی کوردستانیان کرد لە پاریس.
لە سەردانەکەدا باس لەیادی رۆژی رۆژنامەگەریی کوردستان و رۆژی دامەزراندنی سەندیکا کرا، هەروەها باس لە هاوکاری و پشتیوانی رۆژنامەنووسانی دانیشتووی فەرەنسا کرایەوە.
شاندی سەندیکا، بەرنامەو کۆبوونەوەکانی تایبەت بە میدیا لە فەرەنسا، لەگەڵ نوێنەرایەتیی حکومەتی هەرێمی کوردستان تاوتوێکرد.
