رۆژی هەینی رێککەوتی ٣ـی ئایاری ٢٠٢٤، کە رۆژی جیهانیی ئازادیی رۆژنامەنووسی بوو، لە هۆتێل شیراتۆن لە شاری هەولێر، رێورەسمی کۆتایی خولی راهێنانی رۆژنامەنووسان بەڕێوەچوو، کە لەلایەن رێکخراوی ئاشتی و ئازادی و بە هاوکاری سەندیکای رۆژنامەنووسانی کوردستان و بە پشتیوانی دارایی وەزارەتی دەرەوەی ئەمریکا خولەکە بەڕێوەچوو.
لە رێورەسمی کۆتایی خولەکەدا، هەریەک لە ئازاد حەمەدەمین، نەقیبی رۆژنامەنووسانی کوردستان، پامێلا هاک، جێگری کونسوڵی گشتی ئەمەریکا و سەرۆکی رێکخراوی ئاشتی و ئازادی وتاریان خوێندەوەو دواتر بروانامەی دەرچوونیان بە بەشداربووانی خولەکەدا.
لە خولەکەدا ٢٠ رۆژنامەنووس لە هەڵەبجە، کەرکووک و شێخان بەشداریان کردبوو، کە تایبەت بوو بە نووسینی چیرۆکی رۆژنامەوانی و بنکۆڵکاریی رۆژنامەوانی.
دواتر پانێلێک لەسەر دۆخی میدیا پێشکەش کرا، کە هەریەک لە بژار حەکیم، جێگری نەقیبی رۆژنامەنووسان، رەحمان غەریب، رێکخەری سەنتەری میترۆ و ئاسۆ حاجی، یاریدەدەری سەرۆکی فەرمانگەی میدیاو زانیاری حکومەتی هەرێمی کوردستان، گفتوگۆیان لەبارەی ئاستەنگەکانی بەردەم میدیا پێشکەشکرد.
