سەندیکا رۆژنامەنڤیسێن کوردستانێ/ نڤیسینگەها زاخۆ ل رۆژا ٢٠٢٤/٧/٢٨ گەشتەكا حەفت رۆژی بۆ ٢١ رۆژنامەنڤیس ومیدیاکارێن سنوورێ ئیدارا سەربەخۆ یا زاخۆ بۆ وەلاتێ ئەرمینیا رێکئێخست.
ئەڤ گەشتە ب پشتەڤانی وهاریکاریا بەرێز گوهدار شێخۆ، سەرپەرشتێ ئیدارا سەربەخۆ یا زاخۆ و، ئەنجومەنێ سەندیکا رۆژنامەنڤیسێن کوردستانێ و، هەروەسا بهەماهەنگی د گەل کۆنسۆلخانا ئەرمینیا ل هەولێرێ.
– د ڤێ گەشتێ دا مە هەژمارەکا سەرەدانان کرن ژ وان ژی، سەرەدانا مە بۆ وەزارەتا کاروبارێن دەرڤە یا ئەرمینیا و د گەل بەرێز (د.ئارشاك پۆلادیان) نڤێسەر و شارەزا د خواندنێن کوردی دا وبالیۆزێ وەلاتێ خۆیە ل تونسێ کۆمبووین.
مە بەحس ل بابەتێن ئازادیا رۆژنامەگەری، کەلتۆر وپێکڤەژیانا ئۆلی، پەیوەندیێن کورد وئەرمەنان کر.
– ل رۆژا پاشتر شاندێ رۆژنامەنڤیسان سەرەدانا مالا دەستڤنیسان کر، کو تێدا هند پەرتۆك و نڤیسینێن کەڤنار کو مێژوویا وان بۆ سەدان سالان ڤەدگەریت هاتینە هەلگرتن وپاراستن کو یەك ژ وان بەلگەیان ب کوردان ڤە گرێدایی بوو مە ژ نێزیك دیتن و چەند پرس ژی ل دۆر وان بەلگەیان کرن.
– شاندێ رۆژنامەنڤیسێن زاخۆ ل رۆژا پاشتر سەرەدانا پەرلەمانێ ئەرمینیا کر و جودا جودا د گەل هەردوو پەرلەمانتارێن کورد بەرێزان (رۆستەم باکۆیان و کنیاز حسنوف) کۆمبوون. دانوستاندنێن باش ل دۆر هەبوونا کوردان ل وی وەلاتی وپرسێن گرێدایی میدیا و رەوشەنبیریێ هاتنە کرن.
– هەر د بەردەوامیا سەرەدانێن خۆ دا شاندێ رۆژنامەنڤیسان سەرەدانا هەردوو سازیێن میدیایی (ئاژانسا ئەرمەن پرێس) ژلایێ سەرنڤیسەرێ وێ یێ گشتی ڤە هاتینە پێشوازیکرن و (رادیۆ یا یەریڤان بەشێ کوردی) ژلایێ رێڤەبەرێ وێ تیتالێ کەرەمێ سەیاد ڤە هاتینە پێشوازیکرن.
پرسێن گرێدایی کارێ میدیایێ بگشتی وچەواتیا برێڤەبرن وئامادەکرنا دەنگۆباس ومێژوویا رادیۆیا یەریڤان وخزمەتا وێ بۆ چاند وهۆنەرا کوردی مە ژ نێزیك دیت و ل سەر ئاگەهداربووین.
د ڤان هەموو سەرەدانان دا مە وێنە و لۆگۆیێن پرا دەلال پێشکێشی وان کرن و، باژێرێ خۆ یێ جوان وپێشڤەچوونا وێ و گرنگیپێدانا حکومەتا هەرێما کوردستانێ بۆ پێشخستنا باژێری ژلایێ گەشتیاری وبازرگانی وئاڤەدانیێ ڤە بۆ وان دا ناسکرن.
– د چارچووڤێ بەرنامێ گەشتا خۆ دا مە سەرەدانا چەندین جهێن گەشتوگۆزاری کرن وئاشنای دیتنا دیمەن وسرۆشت وتیتالێن وان بووین.
مەرەم ژ رێکخستنا ڤێ گەشتێ بۆ رۆژنامەڤانێن زاخۆ بۆ هندێ بوو پێدڤییە رۆژنامەڤان ل گۆری پیشەیا خۆ دونیایێ ببینت و ل سەر وکلتۆر وجڤاکێ خەلکێ دی ژی شەهرەزا وخودان زانیاری بت و، ئاشنای شێوازێ کارێ میدیا و راگەهاندنا سازیێن بیانی بیت و هەر دیسان سەقایێ خۆ ژی بگهورت.
سۆپاسیەکا تایبەت پێشکێشی بەرێز (ئەندرانیك هارۆتیۆنیان) کۆنسولێ وەلاتێ ئەرمینیا ل هەولێرێ د کەین کو هەماهەنگیەکا باش د گەل سەندیکا رۆژنامەنڤیسێن کوردستانێ کر بۆ رێکخستنا ڤێ گەشتێ وبهێزترکرنا پەیوەندیێن د ناڤبەرا هەردوو وەلاتاندا. هەروەسا پێشوازیکرنا شاندێ سەندیکارۆژنامەنڤیسێن کوردستانێ/ نڤیسینگەها زاخۆ ل فرۆکخانا نیڤدەولەتیا هەولێرێ.
