هەڵمەتێكی راگەیاندنی پرۆڤیشناڵ بەڕێوەببەن
سەندیكای رۆژنامەنووسانی كوردستان، بەبۆنەی دەستپێكردنی ماوەی بانگەشەی هەڵبژاردنی پەرلەمانی كوردستان، داوا لەسەرجەم دەزگەكانی میدیایی و لیست و قەوارە و هاوپەیمانییەكانی بەشدار لە پرۆسەی هەڵبژاردندا دەكات، هەڵمەتێكی راگەیاندنی پڕۆفیشناڵ دوور لە شكاندن و ناوزڕاندن و دەرچوون لە هێڵی دیموكراسیانە بەڕێوەببەن.
میدیا و رۆژنامەنووسان لەهەڵمەتی بانگەشە بۆ كەس و لایەن و لیستەكان، رۆڵێكی گرنگ دەگێڕن ، بۆ گەیاندنی پەیام و بەرنامەی هەڵبژاردنەكان، هەروەها لە هۆشیاركردنەوەی هاوڵاتیان لەبەشداریكردنیان لەهەڵبژاردن و پیادەكردنی مافی خۆیان لەم پرۆسە سیاسی و دیموكراسییەدا، ئەوەش چاوەڕوان دەكرێت، لەئاستی لێوەشاوەیی و بەرەوپێشبردنی پرۆسەی سیاسیی هەرێمی كوردستان بێت.
لەمڕوانگەیەوە، سەندیكای رۆژنامەنووسانی كوردستان، داوا لەسەرجەم كەناڵەكانی راگەیاندن و رۆژنامەنووسان دەكات، سوود لە پانتایی ئازادی و دیموكراسیی وەرگرن بۆئەوەی كاری خۆیان بەباشترین شێوە بکەن لەهەڵمەت‌و بانگەشەی هەڵبژاردندا، رەچاوی بەرپرسیارێتی دۆخی سیاسی و ئابووری خەڵكی كوردستان بكەن و بەشێوەیەك گوتار و پەیام و راپۆرتەكانیان خزمەتی بەرژەوەندی گشتی و پاراستنی ئاشتی كۆمەڵایەتی بكات.
هەروەها، سەندیكا داوا دەكات، لەماوەی بانگەشەی هەڵبژاردن، سەرجەم لایەنە سیاسیەكان‌و بەشدارانی هەڵبژاردنی پەرلەمانی كوردستان رێز لەرۆژنامەنوسان و نێردەكانی میدیایی بگرن و سەلامەتیان ببپارێزن، داوا لە کۆمیسێۆنی هەڵبژاردنەکان دەکەین لە هەر چوار بازنەکانی هەڵبژاردن هاوکاری رۆژنامەنووسان بکەن لە پێدانی زانیاری و ئاسانکاری بۆ راپەراندنی ئەرکەکانیان.
هاوكات، سەندیكا داوا دەكات، دەزگەكانی میدییایی و رۆژنامەنووسان ، رەچاوی یاسای رۆژنامەگەری ژمارە 35ی ساڵی 2007 و رێنماییەكانی كۆمیسیۆن و پەیماننامەی شەرەفی رۆژنامەنووسی بن، بۆ هەر كارێكی پێویستیش پەیوەندی بە لق‌و نووسینگەكانی سەندیكا و لیژنەی داكۆكی لەئازادی و مافی رۆژنامەنووسان بكەن.
پرۆسەی هەڵبژاردن و بانگەشەی میدیایی ركابەرەكانی هەڵبژاردنی پەرلەمانی كوردستان، پرۆسەیەكی گرنگە كە پشت بەبەشداری كارای جەماوەر دەبەستێت و ئەم رۆڵەش راگەیاندن و رۆژنامەنووسان برەوی پێدەدەن و هاوكار دەبن بۆ ئەوەی هانی هاووڵاتییان بدەن بەشداری لەم پرۆسەیەدا بكەن بەئازادانە، كەدواجار دەبێتە، یەكێك لەفاكتەرەكانی پاراستنی كیانی سیاسیی هەرێمی كوردستان و بەرەوپێشبردنی دیموكراسی.
ئەنجوومەنی سەندیكای رۆژنامەنووسانی كوردستان
هەولێر – 25ی ئەیلوی 2024
