بروکسل / 15/1/2025
دوای بڵاوکردنەوەی راپۆرتی تۆمارکردنی پێشێلکارییەکان ژمارە (33)ی لیژنەی داکۆکی لە رۆژنامەنووسان، IFJ لە ماڵپەر و پەیجی سەرەکی خۆیدا، راپۆرتی سەندیکای رۆژنامەنووسانی کوردستانی بڵاوکردۆتەوە تیایدا هاتووە (فیدراسیۆنی نێودەوڵەتی رۆژنامەنووسان(IFJ) پێشوازی لەو کەمبونەوە بەرچاوەی داتای پێشێلکارییەکان دەکات و دەنگی دەخاتە پاڵ دەنگی سەندیکای رۆژنامەنووسانی کوردستان کە 73 دەزگا و میدیایی و رۆژنامەنووس رووبەرووی پێشێلکاری بۆتەوە لە ساڵی 2024 کە ئەو ژمارەیە کەمترە لە چاو(84) دەزگای میدیایی و رۆژنامەنووس کە لە ساڵی 2023 پێشێلکارییان بەرامبەر کرابوو)
ئەنتۆنی بلانگەر، ئەمینداری گشتی (IFJ) دەستخۆشی لە هەوڵە بەرکارەکانی سەندیکای رۆژنامەنووسانی کوردستان لە تۆمارکردنی پێشێلکارییەکان دەکات و گوتی(لە کاتێکدا پێشوازی لە کەمبونەوەی توندو تیژیەکان دژی رۆژنامەنووسان لە هەرێمی کوردستان بە بەراورد بە ساڵانی رابردوو دەکەین، لە هەمانکاتدا داواکارین لە حکومەتی هەرێم گەرەنتی سەلامەتی رۆژنامەنووسان بکات و دەبێ رێگە بدرێ رۆژنامەنووسان کارەکانیان بەو پەری ئازادی ئەنجام بدەن)
دەبێ ئاماژەش بەوە بکەین، لە پەراوێزی ساڵیادی رۆژنامەگەری کوردی ساڵی 2024 دومنیک برادلی سەرۆکی فیدراسیۆنی نێودەوڵەتی رۆژنامەنووسان (IFJ) و ئەنتۆنی بلانگەر، ئەمینداری گشتی لەگەڵ سەرۆکی حکومەتی هەرێمی کوردستان رێزدار مەسرور بارزانی کۆبونەوە و داوایان کرد ئەنجوومەنێکی رۆژنامەنووسی پێک بهێندرێت لە هەرێمی کوردستان، ببێتە هۆی پاراستنی زیاتر ئازادی رۆژنامەگەری و رێکخستنی رێکارەکانی کە لەگەڵ پێوەرە نێودەوڵەتییەکان بگونجێت.
