هەرێمی کوردستان و فەرەنسا کار لەسەر رێکخستنەوەی میدیا دەکەن
رۆژی چوارشەممە رێککەوتی ١٩ـی ٢ــی ٢٠٢٥ لە شاری پاریس، هەردوو سەندیکای رۆژنامەنووسانی کوردستان و سەندیکای نیشتمانیی رۆژنامەنووسانی فەرەنسا کۆبوونەوە.
لە کۆبوونەوەکەدا هەریەک لە ئازاد حەمەدەمین، نەقیبی رۆژنامەنووسانی کوردستان، بژار حەکیم، جێگری نەقیبی رۆژنامەنووسان و هەندرێن ئەحمەد، سکرتێری ئەنجوومەنی سەندیکا، ئەنتوان شوزیڤیل و ئەنیێس بریانسۆ، هاوسکرتێری سەندیکای نیشتمانیی رۆژنامەنووسانی فەرەنسا بەشداربوون.
لە کۆبوونەوەکەدا لەبارەی دۆخی میدیا بە گشتی لە هەرێمی کوردستان و فەرەنسا گفتوگۆکرا، هەردوو سەندیکا هاوڕابوون بۆ کاری هاوبەش و رێکخستنەوەی میدیا و چارەسەرکردنی گرفتەکانی بەردەم شێوازی نوێی کاری میدیا، یادداشتی تێگەیشتن ئامادە بکەن بۆ واژۆ کردن.
لە کۆبوونەوەکەدا نەقیبی رۆژنامەنووسانی کوردستان، ئەنتوان شوزیڤیل، هاوسکرتێری سەندیکای نیشتمانیی رۆژنامەنووسانی فەرەنسا و ئەندامی بۆردی کۆمسیۆنی پێدانی کارتی رۆژنامەنووسانی پرۆفیشناڵی فەرەنسای بانگهێشتی هەولێر کرد، بۆ ئەوەی بەشداربن لە ساڵوەگەڕی یادی رۆژنامەگەریی کوردی.
ئەمساڵ لە یادی رۆژنامەگەریی کوردیدا، ئەنجوومەنی سەندیکای رۆژنامەنووسانی کوردستان و سەندیکای نیشتمانیی رۆژنامەنووسانی فەرەنسا، بەهاوبەشی لە هەولێر بەناونیشانی دیدی هاوبەش بۆ رێکخستنی میدیا چەند پانێلێک رێکدەخات.
