شاندی ئەنجوومەنی سەندیکای رۆژنامەنووسانی کوردستان و فیدراسیۆنیی نێودەوڵەتیی رۆژنامەنووسان کۆبوونەوە.
رۆژی ٢١ـی شووباتی ٢٠٢٥ لە برۆکسلی پایتەختی بەلجیکا، شاندی ئەنجوومەنی سەندیکای رۆژنامەنووسانی کوردستان کە پێکهاتبوون لە ئازاد حەمەدەمین، نەقیبی رۆژنامەنووسانی کوردستان، بژار حەکیم، جێگری نەقیبی رۆژنامەنووسان و هەندرێن ئەحمەد، سکرتێری ئەنجوومەنی سەندیکا، لەگەڵ مونیر زەعروور، بەرپرسی سیاسەتی رۆژهەڵاتی نێوەڕاست لە فیدراسیۆنی نێودەوڵەتیی رۆژنامەنووسان کۆبوونەوە.
لە کۆبوونەوەکەدا گفتوگۆکرا لەبارەی رەوشی میدیا و کاری رۆژنامەنووسی لە هەرێمی کوردستان و پرسی ئازادی رادەربڕین و مافی رۆژنامەنووسان.
شاندی ئەنجوومەنی سەندیکای رۆژنامەنووسانی کوردستان و فیدراسیۆنی نێودەوڵەتیی رۆژنامەنووسان، گفتوگۆیان کرد لەبارەی رۆڵ و کاری داهاتووی سەندیکا کە بووەتە ئەندامی یەکێتیی سەندیکاکانی وڵاتانی رۆژئاوای ئاسیا.
هەروەها سەندیکای رۆژنامەنووسانی کوردستان تێبینی خۆی لەبارەی کۆبوونەوەکانی ئەو کۆمەڵەیە کەلەریازی پایتەختی سعودیا سازکرا دەربڕی.
لەتەوەرێکی دیکەدا باس لەهەوڵەکانی سەندیکا بۆ سازکردنی کۆنگرەیەکی سەرکەوتوو کرا. دواتر فیدراسیۆنی رۆژنامەنووسان داوای لەسەندیکا کرد، رۆڵی زێدەتر بگێڕێت بۆ پەرەپێدانی بابەتی سەلامەتی پیشەیی رۆژنامەنووسان لەناو دەزگەکانی میدیا لە کوردستان.
لەکۆتایی کۆبوونەوەکەدا، قسەوباس لەبارەی گرنگییدان بە ژیان و گوزەرانیی رۆژنامەنووسان و بابەتی زیادتربوونی کاریگەری ژیریی دەستکرد لەسەر ژیانی تاک و رۆژنامەگەری پیشەییکران.
