ئازاد حەمەدەمین، نەقیبی رۆژنامەنووسانی كوردستان لە لێدوانێكدا سەركۆنەی هەڵسوكەوتی هێزە ئەمنییەكان لە شارۆچكەی عەربەت دەكات كەبەشێوازی تووندو تیژی رووبەڕوی رۆژنامەنووسان بوونەتەوە كاتێك وەك ئەركی پیشەیی خۆیان هەوڵی رووماڵی گردبوونەوەی مامۆستایانی ناڕازیان كردووە.
لەم هەڵسوكەوتەدا هێزە ئەمنییەكان لە شارۆچكەی عەربەت رێگرییان لە كاری رۆژنامەنووسان كردوە و دواتر بەزەبری تووندوتیژی رۆژنامەنووسانیان پەرتەوازەكردوەو راوەدویان ناون و لەئەنجامدا ژمارەیەك لە پەیامنێرانی كەناڵەكانی میدیا دەستگیركراون و دوو لەرۆژنامەنووسانیش بریندار بوونەو كەلوپەلی كاری رۆژنامەنووسیش شكێندراون و دەستی بەسەردا گیراوە
نەقیبی رۆژنامەنووسانی كوردستان وێرای سەرسووڕمانی خۆی بۆ ئەم. هەڵسوكەوتە دەدەبڕێت كەبەمشێوە تووندووتیژییە مامەڵە لەگەل ڕۆژنامەنووسان كراوە ،لە هەمانكاتدا داوا دەكات بەزووی دەستگیركراوەكان ئازاد بكرێن و بەرپرسانی ئەو هێزە ئەمنیانەش رووبەڕووی یاسا بكرێنەوە بەهۆی پابەند نەبوونیان بە یاسای رۆژنامەگەری ژمارە ٣٥ ساڵی ٢٠٠٧ و بەپێچەوانەی ئازادی میدیا و كاری رۆژنامەگەری دیموكراسییەت هەڵسوكەوتیان كردووە.
هەرەها نەقیبی رۆژنامەنووسان رایدەگەیێنێت كە سەندیكای رۆژنامەنووسانی كوردستان لە بەدواداچوونی ئەم رووداوە بەردەوام دەبێت
٢٤ی شوباتی٢٠٢٥