ئەنجوومەنی سەندیکای رۆژنامەنووسانی کوردستان، لەگەڵ هەردوو رێکخراوی جاسەنە و DHRD کۆبووەوەو گفتوگۆیان لەبارەی گرفتەکانی بەردەم کاری میدیا و ئاستەنگەکانی بەردەم ژنانی رۆژنامەنووس کرد.
رۆژی یەکشەممە رێککەوتی 2ــی ئاداری 2025 لە ئۆفیسی سەندیکا، ئازاد حەمەدەمین، نەقیبی رۆژنامەنووسانی کوردستان، بژار حەکیم، جێگری نەقیبی رۆژنامەنووسان و هەندرێن ئەحمەد، سکرتێری ئەنجوومەن، لەگەڵ شوان محەممەد، سەرۆکی رێکخراوی جاسەنە بۆ ئازادی بیروڕاو میدیا، نزار گزالی و ئەڤین نەسرین ئەندامانی دەستەی کارگێڕی رێکخراوی جاسەنەو شادمان ئەحمەد تۆفیق بەرپرسی جێبەجێکردنی پرۆژەکانی سەنتەری پەرەپێدانی دیموکراسی و مافی مرۆڤ ( DHRD) کۆبوونەوە.
کۆبوونەوەکە تایبەت بوو بە راسپاردەکانی خولێکی هاوبەشی نێوان رێکخراوی جاسەنە و سەنتەری پەرەپێدانی دیموکراسی و مافی مرۆڤ، کە خولەکە ماوەی 9 مانگی خایاندووە بەناونیشانی ( بەهێزکردنی تواناکانی ژنانی رۆژنامەنووس، برەودان بەیەکسانی، هاوبەشپێکردنی ژنان لە جومگەکانی بەڕێوەبردن لەپێناو ژینگەیەکی دروست لە میدیادا).
ئامانجی سەردانیکردنی هەردوو رێکخراوەکە بۆ ئەنجوومەنی سەندیکای رۆژنامەنووسانی کوردستان بۆ ئەوە بوو، راسپاردەکانی ئەو خولە 9 مانگییە پێشکەشی سەندیکا بکەن، بۆ ئەوەی بە هاوکاری و هاوبەشی سێلایەنانە کار لەسەر راسپاردەکان بکرێت.
لە کۆبوونەوەکەدا، دۆستانەو راشکاوانە گفتوگۆ لەبارەی راسپاردەکان و دۆخی میدیا و ئاستەنگەکان و چارسەرییەکانی کرا.
