لە چوارچێوەی هەڵمەتی ١٦ رۆژەی بەرەنگاربوونەوەی تووندو تیژی دژی ئافرەتان و كچان ، ئەمڕۆ ٢٥ی نۆڤێمبەر، ئەنجومەنی باڵای خانمان و گەشەپێدان هەڵمەتەكەیان، بە چاڵاكییەك لەژێر ناونیشانی ( هەموو پێكەوە بۆ بەرەنگاربوونەوەی توندو تیژی ئەلیكترۆنی لەدژی ئافرەتان و كچان) بەڕاگەیاندنی جاڕنامەی ئاكاری میدیایی دەست پێكرد.
چاڵاكییەكە بەوتاری هەریەك لە وەزیری ناوەخۆی حكومەتی هەرێمی كوردستان و د خانزاد ئەحمەد ئەمینداری گشتی ئەنجومەنی باڵای خانمان و گەشەپێدان و ئازاد حەمەدەمین نەقیبی رۆژنامەنووسانی كوردستان و ئامادەبوونی وەزیری رۆشنبری و كارو كاروباری كۆمەڵایەتی و وەزیری پەروەردە و نوێنەری قونسڵگەری وڵاتانی ئەورووپی لەهەرێمی كوردستان و سەرۆكی ئەكادیمیای كوردستان و مامۆستایانی زانكۆ و نوێنەری رێكخراوەكانی كومەڵی مەدەنی و ژمارەیەك دادوەرو یاساناس و میدیاكار و چاڵاكوانانی بواری داكۆكیكاری لەمافەكانی ئافرەتان و كچان، بەڕێوەچوو.
لەدوای وتارەكان، پانێلێك بۆ گفتوگۆی پڕۆژەی جاڕنامەی ئاكاری میدیای سازكرا، كە هەریەك لە هەندرێن ئەحمەد سكرتێری ئەنجوومەنی سەندیكا و تانیا گلی دامەزرێنەر رێكخراوی سیید و رەحمان غەریب سەرۆكی رێكخراوی میترۆ و مەریەم. قەرەداخی چاڵاكوانی بواری سۆشیاڵ میدیا و دلزار نزار دامەزرێنەری گۆڤارا مە بەڕێوەچوو.
لەكۆتایی چاڵاكییەكەدا جەخت لەسەر كاری پێكەوەیی هەموو لایەنەكانی پەیوەندیدار لە هەرێمی كوردستان كرایەوە بۆ نەهێشتنی هەر جۆرە توندو تیژییەكی دجیتاڵی بەتایبەتی لەبواری میدیا.
