شاندێکی سەندیکای رۆژنامەنووسانی کوردستان، بە مەبەستی بەشداریکردن لە سی و دووەمین کۆنگرەی فیدرارسیۆنی نێودەوڵەتیی رۆژنامەنووسان و یادی سەت ساڵەی دامەزراندنی فیدراسیۆن ( یۆبیلی زێڕین ) گەیشتە پاریس.
شاندی سەندیکا پێکهاتووە لە، ئازاد حەمەدەمین، نەقیبی رۆژنامەنووسانی کوردستان، ئەکەد موراد، ئەندامی ئەنجوومەنی سەندیکا و هەردوو خانمە رۆژنامەنووس چیمەن ساڵح و سپێدە حازم، لە شاندی سەندیکان.
بەشداریکردنی شاندی سەندیکای رۆژنامەنووسانی کوردستان وەک ئەندامێکی کارای فیدراسیۆنەکە، لە سی و دووەمین کۆنگرەو یادی سەت ساڵەی دامەزراندنی فیدراسیۆن، رۆڵ و کاریگەریی خۆی هەیە لە داڕشتنەوەی سیاسەتی میدیایی فیدراسیۆنەکەدا.
کۆنگرەکە رۆژی ٤ـی ئایار دەستپێدەکات و رۆژی ٧ـی ئایار کۆتاییدێت، لە کۆنگرەکەدا بەرنامەو پلانی سێ ساڵی داهاتووی فیدراسیۆن تاوتوێ دەکرێت، هەروەها سەرۆک و ئەندامانی باڵای ئەنجوومەنەکە هەڵدەبژێردرێن.
سەندیکای رۆژنامەنووسانی کوردستان، وەک ئەندامێکی کارای فیدراسیۆنی نێودەوڵەتیی رۆژنامەنووسان، کە ئۆفیسی سەرەکیی لە برۆکسلە، بەردەوام لە چالاکییە نێودەوڵەتییەکاندا هاوشانی سەندیکاکانی جیهان بەشداری لە چالاکیی و کۆبوونەوەکاندا کردووە، بۆ باشتکردنی یاساکان و پرۆژە میدیاییەکان بەپێی ستانداری جیهانی و کردنەوەی خولی سەلامەتی پیشەیی بۆ رۆژنامەنووسانی کوردستان.
لە کۆنگرەکانی ساڵانی پێشووشدا، کە لە وڵاتانی وەک، فەرەنسا، مەغریب، تونس، سەلتەنەی عوممان، بەڕێوەچوون، سەندیکای رۆژنامەنووسانی کوردستان، بەشداریی کارای کردووە، هەروەها بە سوود وەرگرتن لە پرۆژە و بیرۆکەکانی فیدراسیۆن بۆ خزمەتی ژینگەی میدیایی لە هەرێمی کوردستان دا.
فیدراسیۆنی نێودەوڵەتیی رۆژنامەنووسان، ساڵی ١٩٢٦ لە پاریس دامەزراوە و یادی سەت ساڵەشی لە پاریس دەکاتەوە، ١٣٨ سەندیکا لە جیهان تێیدا ئەندامن و ٦٠٠ هەزار رۆژنامەنووس ئەندامی فیدراسیۆنن.
