بە بۆنەی تێپەربونی (34) ساڵ بەسەر کۆچی دوایی ئەدیب و ڕۆژنامەنووسی گەورەی کورد عەلائەدین سەجادی ، رۆژی 13/12/2018 لە هۆڵی نەورۆز لە تەلاری سەعد عه‌بدوڵڵا لە شاری هەولێری پایتەختی هەرێمی کوردستان ، وەزارەتی رۆشنبیری و لاوان و سەندیکای رۆژنامەنووسانی کوردستان ، رێورەسم و پانێلێکیان ڕێکخست . لە دەستپێکدا د. سالار عوسمان سەرۆکی لێژنەی ئامادەکار گووتاری بەخێرهاتنی میوانانی پێشکەش کردو رۆڵی کۆچکردوی گەورە لە بواری ئه‌ده‌ب و رۆژنامەگەریدا بەرز نرخاند. دواتر بەڕێز خالید دۆسکی وه‌زیری رۆشنبیری و لاوان گووتەیەکی پێشکەش کرد. ئینجا ئازاد حەمەدەمین نەقیبی رۆژنامەنوسان لە گووتەیەکدا ئاماژەی به رۆڵی کۆچکردوو لە بواری رۆژنامە نووسیدا کردو گووتی : عەلائەدین سەجادی و گۆڤاری ( گەلاوێژ ) جمێکی لێک دانەبڕاون و تەواو کەری یەکترن و گەر سەجادی نەبوایە ئەوا ( گەلاوێژ )یش لە دایک نەدەبوو و سەجادی لەم گۆڤارەدا هەم وێنەگربوە و هەم نووسەر و پەیامنێر سەرەڕای بەڕێو بردنی کاروباری کارگێڕی گۆڤارەکەی گرتۆته ئه‌ستۆ، سەجادی شار بە شارو گوند بە گوند گەڕاوەو خەرجی بۆ ئەم گۆڤارە پەیداکردووە .
پاشان بەڕێز کاکە مەم بۆتانی سەرۆکی مەڵبەندی گشتی یەکێتی نووسەرانی کورد گووتەیەکی پێشکەش کردو ئاماژەی بە چاڵاکیەکانی کۆچکردوو لە بواری ئەدەبدا کرد . دوا گوتار لە ڕێوڕەسمی گووتارەکاندا گووتاری خانەوادەی کۆچکردوو بوو . پاش کۆتا هاتنی گووتارەکان ، پانێڵێک بەڕێوە چوو کە ( 3 ) باسی لە خۆگرتبوو : ( سەجادی ، هزرو مێژوو ) د. محەمەد عەبدوڵا کاکە سوور ، ( سەجادی و ئەدەب ) د. شوکریە ڕەسوول ، ( سەجادی و ڕۆڵی لە ڕۆژنامە گەری کوردیدا ) د. جەشید حەیدەری ، شایه‌نی باسه نووسەر مەهاباد قرەداغی پانێڵەکەی بەڕێوە برد ، دواتر دەرگای گفتووگۆ کرایەوە . لەکۆتادا خانەوادەی کۆچکردوو نووسەرانی هەر ( 3 ) باسەکە و باڕێوەبەری پانێڵەکە خەڵاتکران .
